لما أستعبط بالدوام وأطق بوجبل بحركات كاراتيه خارقه دايما افتح ايدي واحركها بسرعه واقول *هههيّيياااااع* !! عاد قعدت افكر ليش لما أكفخه واكسر راسه بحركاتي الكاراتيهيه أقول هالكلمة؟
شنو يعني “هههيييياااااااع”؟
ليش ما يقولون “شنباااااااااااات”؟
يمكن اللي داشين برياضات الدفاع عن النفس يعرفون هالسالفة بس ما عليه مو كلنا مثقفين مثلكم
الصرخه هذي اسمها كياي – Kiai وهي نوع مميز من صرخات الحرب أو القتال – Battle Cry. الكلمة يابانية ومعناها اتحاد الروح أو الروح القتالية. بالصج المفروض ما تنقال “هيييّيااااااع” هذا خطأ شائع، المفروض تكون مجرد زفرة هوا قصيرة وقوية تطلع قبل أو أثناء تسديد الضربه. ويكون الصوت بس حرف ممدود مثل *هووو* أو *هاااا* أو *عوووو* لول
ليش يعني يقولونها بالأساس؟
طلعت السالفة من الثقافة اليابانية -والشرق اسيوية عموماً- وقالوا لما تسدد هالضربات لازم تجمع طاقتك الداخلية (يسمونها كي – Ki) وتطلقها قبل أو مع لحظات تسديد الضربه للمنافس عشان تزيد من قوة الكفخه.
والصرخة هذي مو محدوده بالكاراتيه بس، حتى برياضة الأكيدو، والكيندو، والجودو، وغيرها وايد من رياضات الدفاع عن النفس في اليابان والصين وكوريا وكل ديره يعطونها اسم مختلف شوي.
لازم تنتبه المفروض ما تنقال هالصرخة عمداً، يعني مو أروح على بوجبل واشتغل عليه *هييياااع هييياااع هييياااع* واهز ايدي فوق تحت يعني كاراتيه ، بالصج المفروض يكون الأساس الضربة أول شي والصرخة تطلع تالي من روحها مع تركيزك الذهني الداخلي. لازم “تسمح” للصرخة انها تطلع من روحها بصورة طبيعية، تكون انعكاس لقوتك الداخلية ، مو تصرخها غصب طيب مني والطريج.
اللي يعرف بهالسوالف راح يميز متى تصير الصيحة واقعية لما يشوف شلون اللاعب واقف، شلون مركز ومنسق حركاته، وشلون يتنفس بطريقة صحيحة.
يعني ما يصير المقاتل ما يعطي هالصرخه أو الصيحه؟
امبله مرات تكون ساكنه إذا نسّق التنفس مع الحركة راح تطلع “الطاقة” أو قوة الزفير أثناء الحركة والناس ما تسمعها. الزفير الهادئ القوي المتناسق مع الحركة الجسدية ممكن يضيف قوة للضربه وهو اللي يسمونه قوة الكوكيو – Kokyu Power ويترجمونه بالانجليزي قوة التنفس. تعريف الكوكيو والكياي وايد متقاربين من بعض ومابي أشرح أكثر عشان لا تضيعون واضيع بالسالفة.
عيل بس يقولونها لما يطقون ضربه صح؟
لا مرات هم تنقال مع الحركات الدفاعية اللي تستدعي شهيق وزفير لشد عضلات المعدة والعضلات الداخلية، وحتى مرات يستخدمونها عشان يخرعون المقاتلين الغير متمرسين على الرياضة.
وبس خلص الموضوع،
اذكر مرة فكرت ادش نادي اتعلم هالسوالف بس قلت لا ماله داعي يروحي مكفخ ربعي كلهم طاقهم طق كاسر روسهم بدون شي هالمرة اتعلم رياضة قتاليه؟
منقول من منتدى..