- و الآن مع مجموعة من النكت
ابتسموا على الأقل (لأجلي)
لست بارعة في النكت ( إحم أنا إنسانة جدية)
ههههه
مواضيعي خماسية لذلك سأختار خمس نكت .
- مرة جزائري شارك في من سيربح المليون؟ كي وصل طرح عليه جورج السؤال الأول:
أكمل المثل التالي, " البركة في ....." 1-الخليل 2- القليل 3- سوق الليل 4- نهر النيل
خمم مليح طلع هبط .. ماعرفش الحل .. قالوا أنا ننسحب قالوا جورج يا أخي كي غير وين بديتي .. حاول و كمل برك .. قالوا المشارك: لا خلاص 200 تكفيني عندنا مثل في دزاير يقول خيرها في قليلها.
- مدينة أغبياء تعرفت بزاف بالحقرة من أهل مدينة تبسة (زعما أكثر تحضر) مرة واحد غبي هبط لعند تبسة لقى واحد يخدم (آجو دسيكيريتي نتاع جامعة) قالوا الغبي: انتوما بزاف تضحكوا علينا و عيب عليكم ماشي قاع الناس لي تما أغبياء كاين الذكي فيهم ..
قالوا لاجو دسيكيريتي : لا لا قاع أغبياء ماكانش الذكي فيكم
قالوا هاداك الراجل: أنا ذكي و جربني أنا اليوم جيت خص نص على أساس نثبت ليكم العكس
قالوا لاجو: خلاص نعطيك لغز تحلو راكم أذكياء قاع و أنا الغبي, وافق هاداك الراجل
قالو: اللغز هو يمّا عندها ثلاث ولاد واحد أحمد و لاخر عمر و الثالث شكون؟؟
فكر هاداك الغبي بزاف ما صابهاش .. قالوا: ما عرفتهاش وشنوا الحل؟؟
قالو لاجو دسيكيريتي: عرفت بللي راكم أغبياء الحل: أنا و خويا محمد و خويا عمر
روّح هاداك الغبي لمدينتو ما يضويش لقا مجموعة نتاع ناس من مدينتو حب يلعبها عليهم
قالهم: أنا اليوم هبطت لتبسة و صح أذكياء عطاني واحد لغز غير أنا اللي حليتوا تحبو تجربوه؟؟
قالولو: إيه قوللنا
قالهم: يما عندها ثلاث ولاد واحد أحمد و الثاني عمر و الثالث شكون؟؟
فكرو بزاف ..عياو و ما صابوش الحل قالولو: خلاص نستسلمو قلنا وشنو الحل؟
قالهم: لاجودسيكيريتي نتاع جامعة تبسة.
(بقااا شاد الحل بصفة لاجو دسيكيريتي ههههه و نرمالمو يقولهم أنا هو الابن الثالث دام هيّ يماه).
عجايز زمان ما يقروش الفرونسي مليح .. و راحت فيهم يقولو للـ ordonnance (وصفة طبية) وَردينونس
و هي كاين فيهم الزرقاء و الوردي في الجزائر .. كيما هاد الصورة
أيا مرة راحت عجوز للطبيب و فرغولو اللي لونهم وردي عطالها وحدة لونها ازرق
قالتلو: واش وليدي؟ الوردينونس حبست في دزاير بدلوها زرgينونس
نسبة للون في بالها الاسم الأصلي لـ ordonnance هو وردينونس على جال لونها
آدي سبيسيال للجزائريين ..كاين في تبسة منطقة (من غير مانذكر الاسم) عندهم مصطلحات فريدة غير طبيعية.
- الرصيف يقولولو شوارب الطريق خطراك جايين من لي 2 كوتي.
- المايونيز يقولولو بومادة السلاطة.
- الخوخ يقولولو تفاح القطيفة على جال قشرتو خشينة و حرشة كيما القطيفة.
- تينيل (النفق) يقولولو آمبريمونت خطراك الطونوبيل أو البيس يفوتو عليه من يخرجو من لهيه كيما الورقة في لامبريمونت.
- تاكسيفون يقولولو دار التيليفون .
- البوتو نتاع الضو يقولولو عساس الليل خطراك ديما واقف كيما العساس في الليل.
... هادو يكفو ههههههه مع احترامي لهم .
- واحد ما يعرفش قاع الفرنسي و في عهد الاستعمار كان كاين فندق ممنوع يدخلو واحد من غير ما يقول كلمة بالفرنسية عند البوابة.
آيا واحد الشايب لا علاقة بالفرسية جا داخل قالو الحارس: لازم تقول كلمة بالفرنسية باش تقدر تدخل للفندق
خمم الشايب بزاف نطق قال للحارس: أيا انت اقترح عليا كلمة
قالو : سروال .. ترجملي هاد الكلمة بالفرنسي
الشايب قالو بعد ما خمم بزاف: أعطيني الحرف الأول برك و خلاص.
اشفق عليه الحارس و قالو الحرف الأول p
- على أساس pantalon.
نطق الشايب بعد ما فكر قالو:
pـِـيرْوَال
ما شاء الله ذكاء خارق
إلى هنا أصل إلى نهاية هذه المشاركة هههههههه نعرف بلللي لا علاقة
مي هادو اللي تفكرتهم.